قام علاء عرفة أحد أبناء حزب النور بكتابة قصيدة للرد علي المنشد ياسر فاروق أبو عمار بعد هجومه علي الحزب وإنشاده قصيدة يهاجم فيها حزب النور الذي كان سبب في شهرته بين أبناء التيار السلفي، بعد إنشادة نشيد "يا مصر صباحك نور". وهذا نص قصيدة علاء عرفة للرد علي أبو عمار. يسلم فمك يابو عمار....ياللى فتحت علينا النار ياللى مقامك بان فى كلامك....بوضوح قوى وانت بتنهار ونسيت اصلك وعديت ناسك....وبقيت تتنكر لأساسك وحماسك زود فى غشاوتك....وعدمت المرحوم احساسك والضلمه اللى انت بقيت فيها.... متخبط وشايفها نهار خلتنا نقولك بجداره....يسلم فمك يابو عمار مش دى الدعوه اللى اتغنيت....بيها فى وقت من الاوقات مش دا الحزب اللى انت دعمته....بإنشادك فى المؤتمرات بس عزائنا ان انت يا ياسر....زى الشافعى اتنين بحالات يمدح مره ويشتم مره....ويرجع يكتب فى إعتذارات واهو على كده يجى مره معانا.... ومره علينا ومتناقضات دلوقتى انضميت لفريقه....وبقيتو يا بركه دويتات باذلين مجهود مضنى وشاق....خايف لا يكون عقبه مرار يسلم فمك يابو عمار يكتبلك وانت تروح قايل....ويسقفلك ويقول هايل وانت وراه فرحان بكلامه....والشهره دى بتسوى هوايل ياخساره يا منشد دعوتنا....ياللى سندت على عمود مايل صور وانشد واشتم وانشر....واعلم ان المجد دا زايل خاف على نفسك احسن تيجى....فيوم الدين على ظهرك شايل حمل تقيل واييا حقوق ناس....يفصل فيها عزيز جبار يسلم فمك يابو عمار يابو عمار يابو نفس أبيه....آهى تمرت فيك التربيه والعلماء اللى انت عارفهم....وشهدت لهم مره وميه بقوا دلوقتى وحوش من جوا....وانت بقيت عالم بالنيه ياخى عيب دانت راجل متدين....ومكثت سنين فى السلفيه ولحوم العلماء مسمومه....واللا دى كات شعرات وهميه دعوه وربى يبارك فيها....دلوقتى شايفهم ضلاليه صخره تحطم كيد اعاديها....كانت كلمات للتسليه ميه وتمانين درجه يامؤمن....ولا فى انصاف ولا وسطيه ولا فيش مرعاه للأعراض....والحب اتحول عدائيه اللى بتشتم فيه دا مفوض .....امره لإله البشريه اللى فيوم كنت قاعد جنبه....وتقول والله دا ياما عليا وبتهتف وتجيب من قلبك....يومها هتافك بكى عنيه ما تعلمتش منه فى مره....كلمه ولا مسأله علميه ولا صححلك شيئ فى عقيدتك....ولا زاد فى علومك الشرعيه دا الحر يراعى وداد لحظه....والتانى للخير نكار يارب احفظنا وثبتنا.....واكفينا شر الاوزار يسلم فمك يابو عمار ابو عمار البطل الثاير....طالع فى اليوتيوب بيعاير ومعاه العلامه الشافعى....ياخدوا ويدوا فى كلام باير احنا كتبنا احنا عملنا....وعلى الدين كان دمنا فاير احنا صرفنا من أموالنا....ولفينا مؤتمرات ومساير ولا حد فيوم ادانا حاجه....ولا كلفناش حد خساير طب والله شكرا عالواجب....بس المن دا خزى وعار يسلم خالد وابو عمار بكره الحق مسيره يبان....وها تعرفوا مين الغلطان فى قبلكو ياما كتير حاولوا....يهدموا فى الدعوه دى زمان برضه الفهم الخاطئ خدهم....لطريق الزيف والبهتان واتعاملو بعواطف ساذجه....ولا فى أدله ولا برهان وانتحلوا صفات العلماء....وإجتهدوا وأفتوا الشبان تركوا العلم وتابعوا هواهم....والهوى قائد للعميان ضاعوا وضيعوا ياما معاهم....وما صحيوش غير بعد أوان رجعوا وقالوا الحق معاكم....وطريقكم كان خير وأمان وإتأخروا عن قطر الدعوه....واللى إتأخر بقى ندمان إتذكروا حالهم وإتعظوا....والذكرى دى زاد الاخيار ودا ردنا أبناء الدعوه....على خالد وعلى ابو عمار
