يواجه كثيرون مشاكل مع المدراء في العمل، وبسبب منصبهم لا يستطيعون انتقادهم بشكل واضح، رغم المعاناة التي تواجه الموظفين جراء ذلك.
ويقدم مصطفى خليفة، استشاري تطوير الأعمال، نصائح لكيفية نقد مديرك وطرح ملاحظاتك بطريقة فعالة، حتى لا تشعر بضيق بسبب تصرفات المدير.
1. اختار الوقت المناسب
"لازم تختار وقت مناسب تتكلم فيه مع مديرك، وخد بالك من ظروف الشغل ومن ظروفه الشخصية، حاول تختار وقت ميكونش فيه ضغط شغل أو حاسس أنه مضايق أو متنرفز، أنت عايز توصل نصيحتك بشكل فعال".
2. لا بد أن يوجد خصوصية
"النصيحة على الملأ فضيحة، أنت عايز تنتقده مش أنك تخلي شكله وحش قدام الناس، اختار وقت تكونوا فيه لوحدكم، وطبعا يكون الكلام وجها لوجه مش من خلال تليفون أو رسايل".
3. اختصر في الجمل
"متخليش النصيحة أو التعليق باستخدام كلمات وجمل كتيرة، خليك مختصر ومركز على اللي عايز تقوله عشان كلامك يبقى له تأثير".
4. استشهد بمواقف أو أدله
"ميبقاش كلامك إنشا، لازم تتكلم بموضوعية وبأدلة ومواقف عشان يبقى لكلامك مصداقية".
5. كن مرتب ومستعد
"جهز النقط اللي هتتكلم فيها وخليك مرتب، كل ما تاخد وقت في التفكير هتقول إيه وإزاي كل ما يكون تأثير كلامك أفضل وهيفهمه بشكل أفضل".
6. كن محترفا
"زي ما قلنا من خلال الترتيب والأدلة، بس كمان ميبقاش كلام فيه تضخيم أو تصيد للأخطاء ويبقى فيه دبلوماسية وتركيز في اختيار الكلمات".
7. احرص على لغة الجسد
"كمان لغة الجسد مهمة في توصيل المعلومة، حركة ايدك وقعدتك صوتك بيغيروا المعنى تماما".
8. كن حيادي
"حاول بينك وبين نفسك تكون حيادي، ومتخليش موقف معين حصل أو أهواء شخصية تغير من نقدك أو طريقتك معاه".
9. النقد للبناء ليس للهدم
"اجعل نصيحتك ونقدك هدفه التحسن وأنك تبني مش تكسر، لو لقيت الكلام ماشي في اتجاه شد وجذب، وفقدت الغرض من التحسين حاول توقف المناقشة وتكملها في وقت تاني".
10. وجه الشكر له
"اشكره لوقته وعلى سعة صدره في تقبل النقد، لازم تنهي كلامك بتأثير إيجابي معاه عشان يكون فيه تغير في المستقبل".
