اشتكى عدد من طالبات معهد دسوق الثانوى الأزهري للبنات من سوء معاملة إدارة المعهد والمدرسين لهن نظرًا لكونهن يقطن بقرية "شباس الشهداء" التابعة لمركز دسوق بمحافظة كفر الشيخ والتى تبعد عن مدينة دسوق 12 كيلو متر.

في البداية، تقول الطالبة "ر. م": أقسم بالله العظيم إحنا بنتبهدل فى المواصلات ومن المدرسين اللي بيدخلوا من غير ما يعرفوا احنا مين ولا منين.. وبيقولو لنا شكلكم من شباس الشهداء وفلاحين؛ دا احنا كمان بنروح نتشتم احنا بنتشم ووالدينا.. احنا بنطالب بانشاء معهد خاص بنا فى قريتنا حتى لا نتعرض للإهانه اليومية.

وأضافت الطالبة "ف .م": نتعرض للمضايقات بشكل يومى ومش عارفين نعمل إيه من كثرة المشاكل ومعاملتنا كطلبة من الدرجة الرابعة ويتم سبنا لمجرد أننا من قرية ريفية.

اما الطالبة "س . ع" فتقول: انا كمان طالبة من نفس المعهد الثانوي احنا فعلا بتعامل بطريقة وحشة اوى.. بنتهان من المدرسين اللي بيقولوا كلام مش مناسب لمدرسين بتدرس لطلبة فى الازهر، شباس الشهداء فيها ايه وحش علشان يحصل لنا ده كله مش عارفة، واذا بنت دافعت عن نفسها، يتم اتهامها بالرد على معلمة الفصل وانها مش متربية.. وكل يوم مشاكل والمعاملة دى من زمان وللاسف ناس كتير حاولت ان يكون فية معهد عندنا بس  فشلوا.

وتضيف "س . ع": فيه في معهد الاعدادى بنات بشباس الشهداء دور فارغ ملىء بالاتربة.. يعنى فيه مكان ندرس فية ثانوى لية مفيش فية دراسة بقى.. محتاجين معهد ثانوى.. بجد بنتظلم كتير.

وناشدت الطالبات الدكتور أحمد الطيب شيخ الأزهر والدكتور عباس شومان وكيل مشيخة الأزهر بسرعة التدخل لإيقاف هذه المعاملة السيئة لهن ونقلهن إلى قريتهن حيث يوجد بالمعهد الإعدادى الأزهرى بالقرية الكثير من الفصول غير المستغله وذلك حفاظًا عليهن من الانتهاكات التى يتعرضن لها بشكل مستمر.